Arhiva 2008


Putovanje "Krampusi" St.Johann im Pongau      06.12.2008

Ko ča san obećal, ukratko ću vas izvjestit o zadnja dva događaja, na kih smo sa zadovoljstvon sudjelovali.
Prvij' bila posjeta dječjen vrtiću "Čavlić" ( 05.12.), komu su za blagdan Sv. Nikole "Dondolaši" darovali hladnjak, Toj' jako razveselilo tete 'z vrtića, a TZ Čavle sej' potrudila da hladnjak bude pun bonbonih i sakakovih slatkiših, čaj' pak oduševilo naši mići prijateli. Naravno daj' to bil samo del programa, va kon je ipak glavnu ulogu imal Sveti Nikola ( Frenki Fućak ). On je posebno darival dicu, a ona su mu za uzvrat podarila pjesme i recitacije, ke su vredno naučili za tu priliku.
Drugi događaj ( 6.12 ) je bilo gostovanje "Dondolaših", doduše ov put va "civilu" na tradicionalnoj povorki "Krampusih", va austrijskon mestu Sankt Johann im Pongau, blizu Salzburga. Biloj' to ustvari studijsko putovanje, pa smo posjetili i staro austrijsko etno selo, va mestu Huttschlag koj' va
nacionalnon parku "Hohe Tauern". Znan da će ov' članak "pratit" puno atraktivnih fotografij',a saka govori više od tisuću mojih besed, pa ću Van još samo reć, da smo uspostavili nikuliko kvalitetnih kontaktih i da verujemo, kako ćemo dogovorit gostovanja najkvalitetnijih grup "Krampusih" na manifestacijah "Grobnišćina zvoni" va predstojećih letih.
Pogjedajte snimke:
1.del -2.del -3.del -4.del -5.del
Pogjedajte slike: 1.del -2.del -3.del 
napisal: Nikola Vrančić - Kolja


Druženje na Ričini          27.04.2008. 

Nediju 27.04.2008.leta smo imeli naše godišnje druženje na Ričini.
Sako leto šetemanu pred prvi maj organiziramo velu feštu na Ričini za si naši člani , prijateji, sponzori i simpatizeri. To nan je idealna prilika da i mi počastimo onih ki nas vavik dočekaju zvelin srcen jis i pit. Isto tako da se si okupimo na jednon mestu i na miru poćakulamo aš kad mi dohajamo pu njih onda vavik moramo žurit i nimamo vrimena ćakulat.
Druženje je trajalo od 10 jutro pa do jedno 8 večer, se sej pojilo i popilo a to za nas znači daj fešta uspjela. Došli su nan i dragi gosti zvončarih i drugih udrug ke se bave zmaškarami ča nan je jako drago. Nadan se da ćemo se i drugo leto ovako lipo družit.
Ovdi pogjedajte slike
napisal: A.Žeželić 


Godišnja skupština          05.12.2008

Akoj' ki pomislel da Dondolaši miruju, da imaju "Zatišje pred buru" grdo sej prevaril. Tako smo petak 28.11. održali redovnu izvještajnu i izbornu skupštinu. Va lipo popunjenoj sali Doma na Čavji, podnesena su izvješća predsjednika udruge, financijsko izvješće tajnika, izvješće časnoga suda, te izvješće nadzornog odbora. Izvješća su popraćena slajdovimi na platnu, pa su evocirane i uspomene ne događajimi bogato, sad već pasano leto. Potli toga nazočnimi sej' obratil načelnik općine Čavle, gospodin Željko Lambaša. Nakon čestitke na dosadašnjen radu, zaželel je Dondolašon puno uspjeha va narednon periodu. U ime turističke zajednice općine Čavle skupu sej` obratila i gospođa Gordana Gržetić ka je istaknula dobru suradnju snami. 
Novo rukovodstvo "Grobničkih dondolaših" va sastavu: predsjednik Nikola Vrančić-Kolja, članovi odbora Rafael Pešut, Dino Perić,
Anđelo Grlaš, Danijel Fućak i Vedran Grubešić, časnoga suda Zlatko Viškanić, Danijel Fućak, Robert Reljac, te Vanja Perić
na upražnjeno mesto va nadzornon odboru zibranoj' voljun nazočnih članih skupštine, va izbornon delu večeri.
Kad smo to se lipo odbavili, prešlo sej' na revijalni del, va kon su Dondolaši zibrali najbojega Dondolaša za 2008. leto. Va konkurenciji za tu prestižnu nagradu nominirani su Dondolaši:
Danijel Fućak (stariji), Josip Sudan i Rafael Pešut kij' i ponesal laskavu titulu "Dondolaš leta 2008."
Nakon togaj' usljedilo druženje i pripreme za donaciju hladnjaka zbonboni čavjanskomu vrtiću "Čavlić" povodon blagdana Svetoga Nikole, pa pripreme za gostovanje na povorci Krampusih va mestu Sankt Johann im Pongau (Austrija) 06.12. i konačno zahtjevne pripreme za
organizaciju Dočeka Nove 2009. va Domu na Čavji na ki Vas sih skupa lipo pozivamo.Nemojte potli reć "da smo znali da će bit tako dobro, siguro bimo šli"......
Verujen da ćemo nać vrimena da Vas izvjestimo kakoj' bilo na najavljenimi događajimi ?!!!
Nakraju Vas lipo pozdravjan, uz kako bi Aljoša rekal:
" ŽIVIO PUST "
Ovdi pogjedajte slike

napisal: Nikola Vrančić - Kolja


Gostovanje Čapljina 2008          09-10.08.2008.

Na poziv Čapljinske Turističke zajednice da dojdemo na ljetni karneval va Čapljinu nismo se puno premišjali nego smo se dobro parićali i krenuli po prvi put va Bosnu i Hercegovinu.
Po prvi put nan je zato i ča je to jedini karneval ki se sako leto održava va Bosni i Hercegovini a kako nan je bilo i kako su nas dočekali i ugostili sigurno ni zadnji put.

Krenuli smo 08.08.2008. na pol noći ko i saki put z autotransovin buson pomalo prema Dalmaciji. Va busu smo imeli za popit i pojist a dve harmonike su nas celin puten zabavjale. Stali smo par put da se malo rastegnemo i tako smo došli do Neretve uz ku smo se počeli digat prema Hercegovini. Došli smo va Čapljinu oko desete ure i našli se z organizatoron i sprijatejimi Feštađunimi z Budve (Crna Gora). Popili smo pijaču i krenuli prema hotelu ki se zove
„San kod Kike“. Malo smo se ofriškali i šli obedvad. Kad smo se dobro najili va hotelu šli smo zajedno na izlet va Međugorje ko nan je bilo od hotela z buson jedno 10 minutih. Čin smo došli šli smo na brdo ukazanja pomolit se Gospi . Potli smo šli va komunu Cenacolo na njihovo svjedočenje. Se smo lipo pogjedali seli va bus šli se parićat va hotel i krenuli va Čapljinu na ono po ča smo i došli. Va karnevalu je bilo dvajsetak grup saka grupa se j prestavila na pozornici a posle j bil koncert od Crvene Jabuke. Oko ure zapolnoćun smo krenuli va hotel aš smo bili već jako umorni, stin da su se još niki kupali va hotelskon bazenu. Jutro potli marende šli smo još va Međugorje pogjedat crikvu i pomalo prema Riki. Zapolne smo stali na slapove Krke aš se dobro zna da mi nikamo ne gremo ko koferi nego od sakog potovanja bimo teli pogjedat ča se više more. Oko Šibenika j gorelo pu autoputa a mi smo onako spol oka pratili kad ćemo doć doma. Došli smo točno i kako smo planirali oko polnoći. Slike smo neke stavili tako da morete pogjedat .Ovdi pogjedajte slike
napisal: A.Žeželić 


Gostovanje  Bergamo - Italija      02.03.2008. 

Bergamo, 02.03.2008. „Sfilata di mezza quaresima“ jedno predivno gostovanji va Italiji za ku puno nas misli kako ju dobro poznamo, a ka nas vavik ponovo iznanadi i ponudi nan nič novo, lipo i nezaboravno.
Ovo moje iskustvo, ko želin podilit z vami, ki niste imeli tu privilegiju da ga sami doživite, počinje pred pet let kad san se igrun slučaja našal blizu toga prelipoga grada
sjeverne Italije. Mesto z koga ću počet ovu moju prvu reportažu zove se Ponte di San Pietro, blizu Bergama.Vrimej' Korizme, Nedijaj' i ja san potli maše, a prvo obeda šal malo prošećat po tomu slikoviton gradiću. Vaje blizu crikve videl san nikakov plakat od maškar za ki san mislel kakoj' ostal pozabjen od pasanoga karnevala. Šećen ja tako naprvo kad vidi vranića visi tamo još jedan, pa drugi i najzad su me „naješkali“ pa san stal i počel čitat. Nemalo san se iznenadil kad san shvatil da ti plakati uopće nisu stari. Najavljivali su maškaranu povorku za sledeću Nediju !? Prvo ča mij' palo na pamet je bilo daj' Korizma, pa da san va Italiji, srcu katoličanstva i niš mi ni bilo ćaro!
Ako ti ča ni jasno, najboje tij' pitat onoga ki zna. Tako san i ja pital domaćini i to malo stariji judi i oni su mi rekli daj' to pu njh običaj već više od sto i pedeset let. Pa konačno ča se ja čudin, kad se Nedije i tako ne broje va korizmeni dani.
Da stvar bude zagonetnija taj običaj gaje va još desetak mest po Italiji.
Znal san da ča takovoga nemore proć mimo mene i jedva san dočekal drugu Nediju.
„Sfilata di mezza Quarezzima“ kako „Bergamaschi“ zovu tu svoju povorku pokazala mij'
daj' dostojna sakoga evropskoga karnevela, kako po broju učesnicih, po kvaliteti maškaranih grup' , po broju posjetiocih, po organizaciji, ma baš po semu.Posebna štorija su alegorijske kola. Fasciniraju kvalitetun izrade, s puno detaljih, a sakako i svojun veličinun. Pa ipak mej' najviše oduševila neverovatna veza posjetiocih i maškar va povorki. Gledatelji, a moran reć da jih je sih ras i kolorih, izuzetno teplo i srdačno dočekuju saku grupu, bez obzira od kud dohaja.
Naravno, nebin ja bil to ča san, da va sen ton šušuru nis videl i moji Dondolaši. Tad doduše samo va svojoj mašti, ali za ko leto… ki zna?
I na moje velo veselji to leto j' došlo ove 2008. Prilika izuzetna. Maškare kratke.
Dondolaši željni zvonjave. Još kad san doznal daj' i pu nas nekad Nediju, sredinun Korizme bilo dozvoljeno „feštat“ za izuzetne prilike ( rođenja, kršćenja i dr. ), nestal je i strah od onoga ča će judi reć da zvonimo va Korizmi.
Mobilizirali smo se va odboru, kontaktirali organizatori “Sfilate“ udrugu „Ducato Di Piazza Pontida“, i za par dan sej' bilo parićano za krenut na još jedno gostovanje. Ov' put na zapad i za razliku od dosadašnjih revijalnih gostovanja, ov' put smo iskoristili mogućnost te manifestacije i hrabro se prijavili va takmičarski del povorke.
Krenuli smo Nediju 02.03.na 2 jutro i nakon kraće vožnje došli na „Šengensku“ granicu.
Probudili dežurnoga policajca i nakon „kraćega“ zadržavanja ušli va Evropsku uniju.
48 veselih Dondolaših zajedno z neizostavnun logistikun sretnoj' došlo na ulaz va Bergamo, kadi nas je dočekal predstavnik domaćina i popratil va centar. Tu smo dobili vodića i uputili se va gornji grad ( „Citta alta“ ). Priliku da upozna bogatu srednjevjekovnu povjest staroga Bergama iskoristilaj' jedna grupa Dondolaših, a drugaj' iskoristila jedinstvenu priliku da prezentira stanovnikon Bergama grobničke pjesme i tradiciju na najposjećenijoj šetnici toga grada od 120 tisuć duš'.Moren reć da smo već tu dobili naznake onoga ča sljedi, aš smo bili jako dobro prihvaćeni i nagrađeni za uspješnu prezentaciju. Nakon toga tribaloj' poć ča i pojist. Obed je bil parićan va jednon sportskon objektu.Biloj' dobro i dosita. Nakon kraćega predaha krenuli smo na mesto okupjanja karnevalskih grup.Tu smo se razštrkali i šli pogjedat konkurentske grupe. Moran napomenut daj' naša oprema, a naročito krabuje izazvala velu pozornost i da nan sej' javilo više predstavnicih sličnih manifestacij' 'z Italije ki su izrazili želju da posjetimo i njh, pa verujen da će usljedit novi pozivi već drugo leto. Iakoj' dan bil sunčan i nestvarno tepal ( +22 C ) uru vrimena prvo početka povorke niš ni dalo naslutit da će nas uz oko 2,5 kilometra dugu trasu dočekat priko 60 000 tisuć gledateljih. A dočekali su nas i to prijateljski i teplo koda smo njihovi. I ne samo publika već i mediji, tako da smo imeli priliku va direktnon prenosu reć celoj Italiji par besed kako o Dondolašon tako i o našoj Grobnišćini, Naš nastup je bil solidan. Za te dve i pol ure samo smo va dva navrata kratko predahnuli, a se drugoj' bila „čista“ zvonjava. Moran pohvalit logistiku z vozićen ka ni dozvolila da dehidriramo i ka nan je pomogla da budemo pravi do kraja. Dondolaši nemoran hvalit, njih i njihov nastup najboje hvali prvo mesto ko smo dobili va izuzetno jakoj konkurenciji, ko i iskreno odobravanje sih prisutnih nakon proglašenja na glavnoj pozornici. Trudni, ali zadovojni i ponosni sretno smo se vrnuli doma pondijak 03.03.na 3 i pol zapolnoćun.
Ovdi pogjedajte slike
napisal: N.Vrančić-Kolja


Gostovanje Yambol - Bugarska      15-16-17.02.2008. 

Za nas ni još završil mesopust 2008.
Utorak 05.02.2008.leta smo obašli po već dobro poznaton putu našu općinu. Kod i vavik počašćeni smo gospodski. Na 7 večer spreda doma su nas dočekale Čavjanske maškare i puno, puno judih pa smo si skupa malo zaplakali kad smo palili pusta. Potli smo si šli va dom na izvlačenje brojih ovogodišnje tombule Grobničkih Dondolaših,
(ovdi vidite broji ki su zivučeni) pa smo malo i zatancali zadnji put pred korizmu. No, ovo leto moren reć daj bilo kratko ali dinamitno.
Za nas to ni bil kraj aš smo se zajedno počeli parićevat za putovanje od 1500 km va grad Yambol (Bugarska). Dogovorili smo se da negre celi bus nego samo nas 7 s`kombijen i da to bude ko jedna delegacija va Bugarskoj ka će videt ča se događa tamo i dogovorit neki budući susret s`njihovimi zvončari. Folklorno-etnografski institut istočne Evrope s`sjedišten va Sofiji i gospođa Rumijana nas je pozvala na okupjanji KUKERIH (zvončarih) va gradu Yambolu. Krenuli smo 13.02.2008.leta na sedan večer, nas sedan dondolaših, Žarko Lučić (ki dobro pozna običaji va Bugarskoj) i Boris Sušanj ko snimatej i fotograf. Potli 17 ur stišnjene vožnje va kombiju došli smo va grad Yambol i hotel Tunža ki se zove po rijeci ka teče kroz grad.
Grad ima oko 90000 stanovnicih, pa iako je Bugarska va Europskoj zajednici vide se još tragi bivše vlasti tako da je se dosta siromašno i judi teško živu. Teško živu ali su sedno veseli i lipo su nas dočekali i počastili. Onako umorni šli smo spat na pol noći kako bi jutro bili parićani za povorku Kukerih. Stali smo se oko osme dobro pomarendali i šli na predstavjanji. Videli smo 36 različitih grup ke su nas stvarno oduševile kako svojimi nastupi tako i svojimi bojami ke nose i svojin velin srcen aš je bilo jako zima ali nisu marili za tin.
Moran priznat da nismo nikad videli na jednon mestu tuliko zvončarskih grup pa nas je sih malo to iznenadilo. Zapolne smo šli na primanje pu njihovoga gradonačelnika komu smo dali pokloni naše općine i grada. Nediju smo šli najprvo va jedni staru vinariju ka je među 4 najveće vinarije va Bugarskoj kadi smo egustirali njihovo vino i rakiju pa smo onda šli va jedno selo komu se ne moren sjetit imena, kadi smo s`kukeri toga sela obahajali po kućah i pobirali jaja. Isto jedno lipo i nezaboravno iskustvo.
Pondijak smo šli na Crno More va dva lipa primorska gradića poslikali se, poobedvali i krenuli put kuće. Nismo prošli ni 30 kilometrih kad nan se j` pokvaril kombi!!!! Onda je počela još jedna avantura ka je na kraju super završila ali moren reć da nan ni bilo sedno. Vozili smo se: šlep službun do grada Burgasa onda s`taksijen do željezničke stanice pa z vlakon do Sofije, pa z buson do Niša, pa z buson do Beograda, pa z vlakon do Zagreba i na kraju z buson do Čavje.
Kasnili smo samo 12 ur a bilo je ludo i nezaboravno i niš nemore pokvarit se ono ča smo lipoga videli i doživeli na avanturi ka se zove Yambol Bugarska. Nadan se da će se ovo naše putovanje splatit kad drugo leto dopejemo jednu grupu Kukerih na „Grobnišćinu zvoni“ i pokažemo simi kako to zgjeda va Bugarskoj.
Ovdi pogjedajte slike
napisal: A.Žeželić


TOMBULA Grobničkih Dondolaših     05.02.2008. 

TOMBULA
GROBNIČKIH DONDOLAŠIH


POPIS NAGRAD

1.SKUTER broj 1293
2.HLADNJAK WHIRPUL broj 369
3.PERILICA POSUĐA QUADRO broj 1252
4.TV – 55 cm QUADRO broj 3314
5.DVD – REPRODRUKTOR QUADRO broj 3557
6.ODOJAK broj 02952
7.MINI LINIJA WATSON broj 748
8.PISAČ CANON broj 673
9.MIKROVALNA QUADRO broj 1448
10.STOLNA LAMPA broj 3146
11.UREDSKA LAMPA broj 1976
12.BUDILICA broj 2335
13.BUDILICA broj 3114
14.UKRASNA DRVENA KOŠARA PLUS broj 3213 + PIJAT G.DONDOLAŠI
15.UKRASNA DRVENA KOŠARA PLUS broj 0904 + VIP – me BOX
16.KOMPLET ČAŠA broj 03057
17.KOMPLET ČAŠA broj 120
18.SOLJENKA broj 02940
19.SOLJENKA broj 3371
20.TORTA broj 3570
21.TORTA broj 1282
22.MUŠKO ŠIŠANJE broj 481
23.MUŠKO ŠIŠANJE broj 1147
24.FEN FRIZURA broj 2556
25.FEN FRIZURA broj 3178
26.MUŠKO ŠIŠANJE broj 375
27.DVIJE VELIKE PIZZE broj 03043
28.DVIJE VELIKE PIZZE broj 1145
29.BOKALETA GROBNIČKIH DONDOLAŠA broj 1149
30.SUNCOBRAN ZA STAKLO U AUTU broj 145 + FIGURA
31.SUNCOBRAN ZA STAKLO U AUTU broj 3141 + PLUS FIGURA
32.SUNCOBRAN ZA STAKLO U AUTU broj 3384 + PLUS FIGURA
33.SUNCOBRAN ZA STAKLO U AUTU broj 3318 + PLUS FIGURA

Se nagrade moru se podignut do 08.03.2008.leta a potli toga gredu va donaciju.
Za dignut nagrade i informacije nazovite na 091- 125-9085 (Davor)
Zlistajte broji i nagrade va pdf formatu 

                                                                                 Odbor
                                                                               Grobnički Dondolaši

     

"Peknjica Čavjanka"
"Butiga Fućak"

Parićal: A.Žeželić

"MESOPUST 2008"     30.01.2008. 

       Judi još malo pa gotov mesopust. Je to moguće? Ovo leto nismo ni počeli a već moramo završit. A ča ćete, toj tako ali zato drugo leto mesopust traje od 10.01.do 24.02.2009.leta ča bi reć sedan šeteman. To će bit pravi mesopust. No gren van reć kadi smo bili i kako nan je bilo do danas. Najprvo smo organizirali doček 2008 va domu na Čavji, kod i sako leto bili su si zadovojni. Potli toga smo imeli službeno opiranji "Mesopusta 2008" ko je padalo na blagdan Sveta tri kraja. Reklo se j` par besed i malo poćakulalo pa j`moglo se počet (pogjedajte slike).
Komać je došal i 12.01.2008. kad smo oprli mesopust va općiji Čavja, ča da van rečen kod i sako leto, si judi veseli, parićani za naš doček, puno jist i pit a bome i hodit. Jedino ča smo radi dažja krenuli uru kašnje pa nismo dospeli doć do Svilnoga. Večer su Čavjanske maškare obisili PUSTIĆA  kog a će važgat 05.02 (pogjedajte slike).
Isto tako i va oćini Jelenji judi veseli a ovo leto smo produžili korak i dospeli va Podkilavac i Soboli (pogjedajte slike). E onda je došal red i naš pohod na Halubje hodeć z Jelenja priko Kopice pa na Viškovo. Imeli smo i dve nove štacije kadi su nas judi lipo primili tako da simi još jedanput HVALA ča su nas lipo dočekali, najili i napili (slike još nisu parićane).
Nediju 20.01.smo kaparirali za poć na "Maškarani Platak" kadi je turistička zajednica općine Čavja i Radio Rijeka a va pokroviteljstvu općine Čavja napravila lipu zabavu za si gosti i maškare na Platku (slike još nisu parićane).
Na 3 ure smo već bili na Krimeji kadi smo pozvonili po staroj turi a to je od
Orijentovoga igrališta pa do kule na Trsatu.
Došal je red i na tradicionalni šesti međunarodni tradicijski izvorno-folklorni karneval "GROBNIŠĆINA ZVONI" kadi smo obahajali mesta od Dražic do Čavje a stali smo na jogu va Pohum,u va Zastenicah i va Podrvnju pu Šupka. Ovo leto su nan bili gosti KORANT”Etnografsko društvo Mirkovci SLO- ”ŠKOROMATI” Podgrad-SLO- ”ŠJME” Vrbovo-SLO- ”KRIMEJSKI FEŠTARI”(Muzika)- “MUNSKI ZVONČARI“ Mune- “ŽEJANSKI ZVONČARI” Žejane- ”BREŽANSKI ZVONČARI” Bregi- “JELENSKE MAŠKARE” Jelenje- “KUD- ZVIR JELENJE” si su se lipo zabavili i pitali da moru doć i drugo leto.
Po prvi put smo nediju 27.01. šli va Samobor na njihov Fašnik. Ča da van rečen za Fašnik, drugačiji judi, drugačiji običaji ali isto ludi za mesopuston, lipo dočekani i počašćeni na čemu jin se zahvajujen.

Ovdi pogjedajte na YouTube našu himnu s likovima z bajke
Novina je i to da ćete moć pratit naše snimke ovdi
napisal: A.Žeželić


"MESOPUST 2008"     10.01.2008. 

GROBNIČKI DONDOLAŠI
POZIVAJU SOBOTU 26.01.2008.leta.
VEĆ ŠESTI PUT ZAREDON NA IZVORNO-FOLKLORNI KARNEVAL
"GROBNIŠĆINA ZVONI"


 

 
 
 
 
 

 Peknjica 
Čavjanka

 Butiga Fućak

 uredil: A.Žeželić

DOJDITE I SKUPA SNAMI
DOČEKAJTE NAŠI GOSTI


”KORANT”Etnografsko društvo Mirkovci SLO
”ŠKOROMATI” Podgrad-SLO
”ŠJME” Vrbovo-SLO
”KRIMEJSKI FEŠTARI”(Muzika)
“MUNSKI ZVONČARI“ Mune
“ŽEJANSKI ZVONČARI” Žejane
”BREŽANSKI ZVONČARI” Bregi
“JELENSKE MAŠKARE” Jelenje
“KUD- ZVIR JELENJE”


1. krećemo od DRAŽIC prema POHUMU na 1100
2. dohajamo na JOG - POHUM - 1145 do 1245
3.priko JEZERA va ZASTENICE - od 1345 do 1445
4. dohajamo va PODRVANJ - na 1530 do 1630
5. oko - 1700 ur dohajamo na ČAVJU
kadi će bit zabava i tanci


Pogjedajte plakat 

Dijelite sadržaj na;

O NAMA NA

 

Rojeni san Grobničan

I otac i mater tu su se rodili
i nono i nona su Grobničani bili
i si su puno lumpali i pili
i veliku su starost doživili

Rojeni san Dondolaš

I naši pranonići vavik su zvonili
i otac i nono su Dondolaši bili
i si su puno lomili i pili
za maškarami sakud su hodili

Kad zazvone Dondolaši
se se trese se se praši
si kantaju si tancaju
zvonci jako dondolaju

Kuda projdu Dondolaši
se se lomi se se praši
teški zvonci kreče škinu
potres trese Grobnišćinu

Kad se spuste Dondolaši
prema Riki uz Ričinu
pomest će po Fijumeri
i po Korzu su prašinu

Kad obajdu Dondolaši
se i jednu oštariju
strašit će po Grobnišćini
i po Riki mulariju

Kad zazvone Grobničani
se se trese od žestine
odvavik su Dondolaši
ponos naše Grobnišćine

Rojeni san Grobničan